قصة جديدة بقلم
:: وردة بلادي ::
الأخوه :: غصن رطب لا ييبس ولا يجف ..
الأخوه :: نهر جاري .. لا ينقطع سيله ولا يكف ..
الأخوه :: صداقة ووفاء .. و رفعة وعطاء .. الى آخر العمر ..
الجزء الأول
التعريف بالشخصيات
خلفان ..
الولد العود .. عمره 27 سنه .. شديد شوي .. يعني بس يعطي نظره وحده الكل يخاف.. وظيفته حكوميه .. وهو خاطب بنت عمه ناعمه ..
حريز ..
ايي بعد خلفان .. عمره 23 سنه ..وهو هادي .. ما يخصه في حد .. تقدر تقول عنه انسان غامض .. محد يعرف بشوه يفكر .. وشوه اللي يدور فراسه .. بس مرح بعض الاوقات .. ينفع ينسيك حزنك .. واكثر واحد فاهم خواته هو ..
اليازي .. واليازيا ..
طبعا من تقارب الأسماء عرفتوا انهن توم .. بنتين عمارهن 18 سنه .. الوحده تكبر الثانيه بـ ثلث ساعه بس .. الأكبر بينهن هي اليازيا .. يشابهن وااااايد وبطريقه فظيعه .. يعني ما في فرق بينهن ابد .. غير ان وحده لها شامه على كفها اليسار .. تحت جهة اليمين وهاي هي اليازي .. بس هالفرق الوحيد بينهن .. شعرهن يوصل لركبهن .. قاصينه طبقتين .. بحيث الطبقه اللي فوق تكون اقصر وتوصل لجتوفهن ..
طوال .. ومب متان ولا ضعاف يعني .. كل وحده عليها خدود ورديه .. ويوم تشوفهن تقول كل النعومه فيهن .. بس العكس صحيح .. دفاشة الدنيا فيهن مع ان ما يليق على مظهرن الخارجي ..
في مميزات بينهن ... اول ميزه واهمها .. ان من تخرجن والعرسان اييون يخطبونهن ولا وحده فيهن توافق .. واذا ابوهن جبرهن .. هن بعد ينجبرن بأنه عريس الغفله يخضع لتجاربهن وخططهن اللي تخليه يشرد ولا يفكر فالعرس ابد ..
فهيد ..
آخر العنقود .. يحب يظهر برع البيت ويلعب دوم ... عقله كبير ويفهم بسرعه .. عمره 13 سنه
---------------
حامد ..
الدنيا عنده لعب لا يروح فكركم بعيد .. عمره 27 سنه.. يعني كل مشكله عنده في هالدنيا ولها حل.. بس كل اللي ذكرته من شخصيتهه يوم يكون ويا ربعه .. اما يمعات العايله بس يشوفهم من مناسبه لغيرها .. وما يجتمع وايد وياهم.. وينقهر من نوف ودلعها ..
ناعمه..
بنت شفافه وناعمه اسم على مسمى 25.. على شدة خلفان و هيبته تحبه ..وهو ولد عمها وخاطبنها .. يعني ما بتلقى احسن منه ..
حارب ..
يحب السوالف والظحك والغشمره .. ويحب اليمعات .. بس تكون يمعات شباب مب شياب .. عمره 23 سنه .. وهو اقرب واحد لـ حريز ولد عمه ..
نوف ..
عمرها 7 سنوات .. وهي وايد حشره .. تموت على اخوها حارب .. بس يوم يكون الموضوع متعلق بسيرتها للعين عند بنات خالها هناك .. تنسى حارب وتنسى طوايفها كلهم .. وهي حاليا هناك ..
---------------
ناصر ..
عمره 27 سنه .. عليه ذاك الجمال اللي يعق الطير من السما ..ربيع خلفان الروح بالروح..اذا بغى يفضفض باللي فخاطره يقوله حق خلفان .. واذا بغى من يساعده في مشكله يلجأ لـ خلفان .. وخلفان بعد نفس الشي .. ويشتغل في نفس المكان اللي يشتغل فيه خلفان ..
شهاب..
حشره + مسولفجي + يخرب كل شي = شخصيه روعه .. عمره 21 سنه .. بعده يدرس فالجامعه نظم المعلومات ..
شذى..
بنيه حلوه وطيبه ..عمرها 19 سنه .. تدخل القلب بسرعه مع انها حشره ... ولانها البنت الوحيده فالبيت .. فكل حد يطلع حرته فيها .. وهي بروحها تدلع عمرها .. لان الدلع كله للولد الصغير اللي هو شهاب .. يشاركها دلع امها واخوانها .. بس دلع ابوها ما يقدر ..
اليازي: متى بيظهرون ؟؟
اليازيا: ما ادري
اليازي: تعبت من كثر ما اتريا
اليازيا: تعالي تعالي بسرعه ظهروا
اليازي: هههههااااااااااي اطاعي شكله هههههه
اليازيا: احسن يتأدب محد قاله
اليازي: هههههه كيف يحجج جسمه قطعه
اليازيا: تصدقين كسر بخاطريه
اليازي: قومي انزين .. ميته عليه وافقي
اليازيا: بسم الله عليه ..
اليازي: عيل اسكتي ..
اليازي واليازيا كانن يراقبن الرياييل وهم يظهرون من الميلس .. والقصه كالمعتاد واحد مثله مثل اي واحد ما عرف حليله بأن في هالبيت ما في بنات للزواج (هذا راي اليازي واليازيا) يا ويبغي يخطب .. بس النتيجه انه خضع لمقلب من مقالب التوم .. الله يعينه .. وهن ملصقات ويوهن في زجاج الصاله .. ومندسات ورا الستاره .. دخل اخوهن فهيد ..
فهيد: شووووه تسون ؟؟
اليازي (فزت من مكانها): بسم الله الرحمن الرحيم
فهيد (وهو ييلس عالكرسي): شوه تسون ؟؟
اليازيا: ما يخصك
اليازي: هاللي ناقص بعد اليهال يدخلون
فهيد: جني ما اعرف انكن تراقبن الرياييل اللي كانوا فالميلس
اليازيا: زين يوم تعرف
اليازي: وفرت علينا
فهيد: والله متفيجات .. وهاللي ياي متفيج زياده .. يعني صدق اهبل ما لقى غير من بيتنا يخطب
اليازيا:انا ادري روح قوله والله
فهيد: لو كان بايدي بقوله والله .. قبل ما ياكل من هالمقالب .. صح تعالن شوه سويتن هالمره ؟؟
اليازيا (وهي تظحك):ههههههههه اصبر شوي شوي .. الحين بتييك الأخبار
فهيد: الله يعين
ومن شافن ابوهم واخوانهم يايين صوب الصاله .. ركظن ويلسن مؤدبات ولا جنه يعرفن بالسالفه او مسويات شي ..
فهيد: الله عالأدب
اليازيا:جب انته
بو خلفان: السلام عليكم والرحمه
الكل: وعليكم السلام
اليازيا: مرحبا بالغالي
بو خلفان: مرحبا بج
اليازيا: اقول ابويه تبغي نحط لك العشا
بو خلفان: بلاج الله يهديج .. توني متعشي مع الرياييل
اليازيا: اوه صح نسيت ابويه اسمح لي
اليازي(وهي تبغي تسحب الكلام من ابوها): ثرنا لهينا ونسينا
فهيد: الحين انتي شدخلج .. هو يرمس اليازيا
اليازي: والله بعطيك بالنعال الحين
بو خلفان: قومي قومي عطيه .. ولا تحسبي لي حساب .. قومي شوه تتريين بعد
اليازي: آسفه ابويه
اليازيا: اسمح لها ابويه .. بس هذا فهيد من الصبح ملعوزنا
فهيد: اناااااااااا ؟؟ والله توني ياي من برع
بو خلفان :وانته ليش ما ييت الميلس تجابل الرياييل ويانا والا فالح بس هياته من بيت فلان لبيت علان
فهيد: ابويه بعدني صغير على هاليلسات .. وبعدين ايي واعرف شوه بتكون ردة الفعل واعرف شوه بيكون الجواب .. اتعب عمريه شحقه
حريز: تعلم
فهيد: والله ما فيه ظحكه لا تظحكني غصب ههههههه
اليازيا:ههههههه هيه والله حتى انا
فهيد (وهو يطالع اليازي): افففففف بعد رمست .. انتي شدخلج
اليازي:لا تطالعني مساعه كنت انا اللي ارمس الحين اليازيا رمست
فهيد: انتي والا هي كله واحد .. تعودنا
خلفان: ها ابويه شرايك بالمعرس
من طرا خلفان المعرس .. واليازيا واليازي يترين بس واحد فيهم يرمس ويقول انه ما يناسبهن ويفتكن منه مثل الباقين ..
بو خلفان: ما ادري
حريز : انا اشوف انه ما يناسب ولا وحده فيهن
بو خلفان: وانا بعد .. من الصبح يالس ويحجج فجسمه .. ما ادري مريض شفيه .. عفانا الله .. ما فينا نبلي وحده من بناتنا به
خلفان: انا بظهر الحين .. مع السلامه
بو خلفان: وانا بسير حجرتيه .. متى ما امكم يت خبروني
اليازيا: ما يحتاي روحها بتيي الحجره عندك
اليازيا واليازي كاتمات الظحكه .. بس يترين متى ابوهن يسير الحجره .. واخوهن خلفان يظهر .. واول ما ظهروا هالاثنين .. ظحكن ظحك لين ما دموعهن نزلت ..
حريز: شوه حطيتن فالميلس؟؟
اليازيا: ما شي
حريز:علي انا هالسوالف .. قولي بسرعه
اليازي:حطينا بودره ههههههههههه
فهيد: مقوات عينكن .. صدق ان كيدهن عظيم
اليازي: توك تدري هههههههه
حريز: انزين بس عاد
اليازيا:ههههههههه اتخيل شكله
اليازي: احسن .. افففف راحه والله راحه
حريز: حرام عليكن .. والله جريمه ولازم تتعاقبن عليها
اليازي:حريز .. انتوا اللي حرام عليكم .. يعني قلنا لكم ما نبغيه العرس .. مب غصب
فهيد: بكفيج انتي وياها .. نحن نبغي نعرسكن ونفتك
اليازيا: مالت عليك
فهيد: اختيه العوده وقدوه وقدوه .. القدوه تقول مالت عليك انا بعد ما انلام
حريز: والله شاك انكن حاطات بس بودره .. الريال قطع عمره ..
اليازي:لا لاتخاف .. بس خل يسبح وخلاص ما بيقطع عمره بعدها
اليازيا:اما اذا كان ما يسبح فهاي مشكلته يعاني لين ما يتكرم حضرته يغسل جسمه هههه
فهيد: لوعتن جبدي
حريز: تصدقن والله حاس بحجه فجسمي .. ليكون حطيتن فالميلس كله
اليازيا:لالا بس وين ما هو يالس ..
فهيد: شدراكن انه هني بييلس؟؟
اليازيا:لان اي حد ايي ييلس هناك
حريز (وهو يحجج جسمه): انا اسير اسبح احسن والله
اليازيا:هههههه روح الحق على عمرك عيل
ابي ردود وبسرعه
